Batang kalye

umiinog ang mundo mo sa kalye
dito ka isinilang
nakipagbuno sa kalikasan upang kahit papaano
ang katawan mong impis ay magkalaman

naging paaralan mo ito--
natututo--tungkol sa buhay, para mabuhay
nakikipagsapalaran sa bawat sandali
kung saan ay walang katiyakan
kung kailan ka matatapos
tanging Diyos lang ang nakaka-alam

palaruan mo ang bawat lansangan
nakikipagpatintero sa mga sasakyan
humahabol sa bawat taong mapaghihingian at mapaghihingahan
upang kalam na tiyan at
sikip ng dibdib ay maibsan
habang nakikita mo ang ibang bata
akay ng kanilang magulang
alam kong itinatanong mo din,
"Pano kaya ang magkaroon ng mas mayamang magulang?"

bata!
hanggang kailan
na ang pagkain ay guni-guni na lang?
saplot sa katawan
ang bahay na inaasam
ang katreng mapaglalatagan ng hapo mong katawan
ang lapis at papel na dapat mong hawak
ay mananatiling
drowing at
kathang isip na lamang?

Posted in: Development Concerns,Photography